اراِیه شده دربرنامه رادیویی استان خوزستان (رنگین کمان همدلی) نمونه زیدنی یا نمونه گدنی یا ضرب المثل

 

               به نوم هوکه گدنیهانه آفرید وگدنیهانه یاد داد

                ضرب المثل (نمونه گدنی یا نمونه زنی) بختیاری

بهلین ز گدشته رهزهشت ورهروشت کهن مردمون روزگار سرتالی دراریم. وگدشتنیهاسونه ز گرفتگیریها وورخردا وریاری وابیدنا وگدشتن ز سرازیر وسروالاییها ، جنگ وآشتی بازی وکار ودرد، رنج ومرارت ویزی نایه(اتفاق) روزماه وسالی وکارونیها وسهد وسازا واندوه وشادیا ، وایک گدنیا ووایک خوندنیا ، وایک رهدنیاهه مین کوچ و وارگه ها وعشایریا وروستاییا وشهرنشینیا ، همه وهمه وخیلی ز چیادیرینه که جاگدنس نید پشت سر نهادناو ونیه داری یاد وخاطره ها ز گدشته مردمون روزگار سی نلس صوه یادگارونسون ، که گپون ودایل وبوویل ، سی دیر بچلا نلق ایکردن . زمین ایهمه یزی نایه روزگارون هم شعر گو وبیت بند کسونی بیدن که هرچه بسرسون ایوید، به شعر وبیت ایوردن. وبعدنا که به یادگار ایمندن ونلساهه بعد زسون سرمشق ایگرهدن ،زنمونه زنیها یا نمونه گدنیا یا همو ضرب المثلانه ایگوم. تک بیت یا نیمه تک بیتی چقدر قشنگ توونمندونه واندیشمندونه واچند گل واچ گدنی نکته ای ایگدن چقدر پر معنی وسازنده. وچقدر قشنگ ایی گل گدنیا بدل اینشست چونو که ملکه ذهن آدومی ایبید. هر تک بیت یا نیم بیتی ز ایی گل گدنیا ریشه ز اندیشه و حاصل کار چندین ساله آدوما بید که گده وابیدن و به یادگار مندن. چی شراو کهنه ای هم بدل اینشستن . نمونه زنیا یا نمونه گدنیا سینه به سینه زنلسی به نلس دیری وازگو ودست بدست ایبیدن گل گدنیاهه گدشته مردمونه نه وا دست کم بگریم وساده زس بگردیم . نمونه زنیا هه بختیاری حتی هرزه هاسون هم قشنگ وپر زمعنی هدن .البته گروه نمونه زنیا بسته ای به حال وهواهه آدوما داره وایما نتریم حال وهواهه جوراجور مردمون دنیانه زس کدمون کنیم یا انکار بکنیم وراستی وحقیقتنه زس لاپوشی کنیم پیش ز هرچی وایونه بدونیم که مین ایی دنیا هرکسی یه چی به مزاجس سازگاره ویونه هم بدونیم  که حال وهواهه گل گدنیا ونمونه زنیا خیلی مین دنیا زیاد وپیچیده هدن. خیلی زگدنیاهه ناگده هم مین دنیا هد نمونه زنیا ریشه مین روح وتن ورفتار وحرکت مردمون دنیا دارن .یا مجالونی نیاز به پند واندرز داریم . گه مجالونی نیاز به نقد رفتار خومون داریم. نیاز به هشدار وآگهی داریم ونیاز به هم اشنی شخصیتی وآشنایی وارفتار یک داریم. یه مجالونی گدنیه تهلی خیلی زحالاهه رفتاراهه ایمانه روشن ایکنه. وایچونه که ایما به کوتاهترین گل گدنیه ریشه دار وپر زمعنا وسازنده نیاز داریم.که همو نمونه زنیا یا نمونه گدنیاهه که امروز بس ضرب المثل ایگوهیم . گدیم که گه مجالی نمونه زنیاهه هرزه مون داریم. ولی خیلی ریشه دار ، بیدار کننده پر زمعنا وخیلی قشنگ واندیشمندونه گده ایبوهن وگهمجالی تهل.بیشترنمونه گدنیاهه هرزه مون به آدوماهه زورگه وشلخته وچورو نادون و لیوه ایگوهن. نمونه گدنیایی چی ز تله هوا کردن . نمونه زنیایی چی ورخرد عاقل ولیوه. نمونه گدنیایی چی بر ونی مین خراوی بدست لیوه یا نادون .ودیر نمونه زنیایی که ایچو جا گدنس نید.گدیم که نمونه گدنیا حال وهوایی سی خوسون دارن. ملث پند ودرس دادن ، سرزنش کردن، امیددادن، معرفی شخصیتا، تربیتی، مانوری، مزمت نادونی یا لیوه ای، زورگوهی وحقکشی، ناسپاسی، بیوفایی ، بی عرضه ای ، ریا کاری ،تقذار گدنیاهه فارسی اعتماد به نفس وخیلی حال وهواهه دیری ملث اینو.یکی دوتا زنمونه زنیانه مثال ایزنیم:هرچی کنیم سی ناکس/ نه ایگوخوه نه ایگو بس(آدوماهه حق مشناسنه ایگو) . گپت ورار کوچیرت وراورده خداییه.(تربیتیه) توکاری ومو کاری /ماعشت روزگاری(همکارینه ایگو دابیامرزیم هی ایی نمونه زنینه سی ایما بکار ایبرد) . علف سر ریشه خوس سوز ایکنه(تربیت حونواده اینه ایگو). منیر به رنگ زردوم گژدینی زیر بردوم(هم یه تقدار مانوره وهم هشداره) . رو جایی که بخوننت / نه جایی که چو وردارن بروننت(هرکی احترامت اینه بس احترام بنه یه نمونه تربیتیه). ار جوم دهرسته الصم نپهرسته (ایر بیچاره ونادار وابیدوم الصومه زدست ندادوم امید به الص خوس داشتنه).یا ار زاسب وستوم زالص نوستوم( ایر اشکستوم ولی ز الص ونسو خوم نوستوم که امید به خو دهیه). بردیم به آسماری / دست زدینوم نیورداری(بیچاره ام کردی ودست زوم نیورداری یه تقدار سرزنشیه). حور سهر مینت خومه کشت وبیرینته مردومه(ریاکاریه). وخیلی دیه ز گل گدنیایی که ناگده مندنه.

 گدنیاتون قشنگ/ گدنیاتون دلی بیارن به چنگ . سرفراز وسردیار وبختیار بوهین

جلال اسفندیاری غریبوند:14/8/96

برنامه رادیویی استان خوزستان (رنگین کمان همدلی) مشک

 

                                به نوم هوکه رهروشت زنده اینه آفرید.

                             مشک

بهلین تابگوم زکار ساده وپر اعتبار ایل. بهلین تابگوم زکار وبار ایل یادی بکنوم ز یکی زالصی ترین کارونیهاسون .کارونی الصی وضروری بختیاریانه ایگوم. زمشک وکارونیس وچطوری مشک راست کردن  . مشکی ریشه اس پوست حیوون بید. پوست حیوون حلال گوشت بید. که قصاوا هم یه جورایی سی دل ایی کار زلاش حیوونا ایکند. زجدا کردن وبریدن دست وپا زمرک و ز زونی . وباد کردن وواز کردن زراه پشت. وجداکردن پاهاسه زپوست وبستن هردوتا پا وبدارکشیدنس ایگوم. وبعد سالم درآوردن پوست زلاش ودست وگردن ز سرتا پادرآوردن پوست ایگوم. پوستی که بدست دیرون جور دیری سی کارونی شلکس عوض ایبید. وسی کارونیاهه جوراجور دیری زس بهره ایبردن. ملث مشک او ومشک دو. یاکه خیگ روغن وتلیکه وعسل یاکه زبده دون ایبید سی کره ورداشتن ونیه داشتن. ویاکولی کلگ بلیط ایبید وسی ورداشتن کلگ ونیه داشتن. وهمبونی ایبید سی نیه داری رهوردار چیاهه خردنی یا دیر چی که ضروری بید. گاهوختایی لواس وزین ، کمربند ودهل ایبید. وخیلی ز چیاهه دیری چینو. راست کردن چیایی که ز پوست راست ایبوهن ایگوم . هرکدومسون روشتی داره. بسته ای به کاار ونیس داره. ایچو ایخوم ریشه جوری بکنوم ز راز مشک واو. و مشک دو سرتالی بدراریم زروشت مشک راست کردن. بهلین تابگوم اول زمشک او. سرگدشتی هم زکوچیری داروم ومشک راست کنی دایل.بیامرزی دامه ایگوم ملث دیر دایل ایل بختیاری یاد ونومسون بخیر بوهن. زحمتا خیلی کشیدن مین دورون سیاه وسخت. بیامرزی دامه ایگوم مهروون دایی که ملث مابقی دایل ایل بختیاری وعشایری ، که چیاهه ضروری وکارونیسونه بدست خوسون واشوق وعلاقه راست ایکردن. همیطور هم چیا مین حونه ایسونه. بچه بیدوم یادومه دام ایخرید پوست ز کسونی که قصاوی کرد وایبردس به حونه . پوسته ار سی مشک او ایخواست،چند روزی مین ظرف او نمک خونید. مطمین اربید که پوست خو او نمک خرده.ایدراوردس . وا چقو یا جسم تیزی مل ومیس ایکند. مین وبیرینسه خو ایرند. دوتا چو به قدیک ایجست چوانه صاف وراست ایکرد.انگله هاهه دودست پوستنه وسط چو ایبست. انگله هاهه دوپانه به چو دیری ایبست.دوتا پاهاس نهاد ری دوسر یکی زچووا بسته .ودیرچونه وادو دستس ایگرهد محکم ایجرنید وکشید ومژگنید تا خو اوس گرهده وابوهه . کش بیاره ونرم آبو. یه هفته مین اوجفت بلیط یاکه زیت دار ایخونیدس. زیت دار اومونده ای به مین چال کنده ساق داربلیطا بید.بعدز یه هفته زمین او جفت یا زیت دار ایدراوردس.وباز هم ملث اول ایگرهدس وجرس ایداد وهی ایمژ گنیدس وکشس ایداد. تاکه بیشتر نرم وابو وکش بیاره.بعد دیدوم وایه قیچی زخود مشک ایبرید تالا بلندینه. تالایی باریک چی رشتن. خو ادیدوم واهمو تالاانگله وته پوستنه محکم دهد. یکی ز انگله ها دستنه بند محکی یا رشتنی بس بست. تادرمشکنه مود پرکردنس بندن. چند کرتی اوپرس ایکرد . دره مشکه ملث جمع کردن مست ایکرد.وایبستس وچند وختی ایهشتس بعد اوس ایرهد.چند روزی دام یوکارس بید . هی پرس ایکرد وایرهدس.ایر که مطمین وابید طم او مزه پوست نیده، یاکه او بی خلط وشیرینه، پرس او ایکرد درس ایبست وری تلواره جادادس او مشک هم سرد وشیرین بید. مشک ایر اوس نداشت خلطی ویا که خلط مشک کم داشت، نشون ایداد که ورویده وابیده. واما مشک دوراست کردن هم خوس روشتی داره .بچه ای خو یاد داروم دام، پوست حیوونه اولس چی مشک او به مین اونمک خونید. ملاس ایکند وچی مشک او ایرندس به جا یه هفته ایدو یه دوسه روزی مین او جفت ایخونیدس وبعد ز اوجفت ایدراوردس وجرنیدس و وایکشیدس وخو ایمژگنیدس تا اوس گرهده وابوهه وکش بیاره ونرم آبو. وایه قیچی هم تال زپوس ایدراورد. وز ته وانگله ها پوستنه ایدهد. وایچو کار دیرس وا مشک او فرق داشت: ایدو پوست جفت خردنه باد ایکرد ودر پوستنه ایبست . تایه چند روزی که خوس ایگرهد وقالوی وابید. پوست کمی حشک بید  . چند روزی بعد در پوست حشکنه واز کرد وچندتا چو منس جاداد. یه بندی بست ز راست انگله پاها  به سقف حونه وبالا تش وچاله ایوربستس .چند روزی واتش وتنگ مین چاله پوست هرروز پر زدی ایبید. بعد چند روزی که خو دی خرد، پوست دی دادنه واز ایکرد. چوانه هم زمین پوست دراوردبید.ایدو پوستنه پر ز او نمک ایکرد. وهردم ایولاییدس. تا خو اونمک به دردوپوستس رهد وطم پوست زبین ایرهد. بعد ز چندروزی که دونست اونمک کارخوسه کرده، دو سر انگله پانه ، ایبست به دو سر بندی. هر انگله ای به یه سر اوبند .دوسر انگله دستانه همیطوری. به یه بندی دیر ایبست. وچو صافی کمی زمشک دو گفتر دوسر چو هرکدومسون دو شیار ایزید.یکی سی بستن وسط بند بسته به انگله ها دیری سی بستن به بند ملار. حالا ز ملار ایگوم: سه سر چوا بلندینه نیم وجب ز نوک سر لمتر. بهم بسته . هرچویی زیک ونیم متری کمی بیشتر. سه چونه ری زمین زیک سواکرده وسه پایه اینه شلک داده . اوارینه زوسط بین سه سربسته چو بسته دوسر بند براوار قدنیمه چو شور به دوسر چو مشک دوبسته بس ملار ایگون .مشک دونه پر ز ماست کردن. واینقدر ایچلقنیدن تا که ماست زیده ودو ایبید. درمشکنه یواش واز ایکنن ودوانگست امتحانس ایکنن ایر که دوزهنست ، مین ظرفی دونه ریزن. کره ها دونه که ری دو بید وادست ایکنن جمع مین درف دیری اینن . کره ودویی که دورونی خوراک الصی عشایر ایل بختیاری بید.

                    چی دایل صویر وکهوار واستوار عشایر بختیاری سربلند وسرفراز وبختیار بوهین

                         جلال اسفندیاری غریبوند 14/8/96

�ه ایروزا آخر جاکت کم ایپوشیدوم ولی یه روز هوس پوشیدن جاکتی کردوم گشتوم ودیدوم خوری ز جاکتا رنگی نید ولی دیدوم که دام هرروز جوراوی جاکت کهنه زاین واون ایگرهد ایورتکنید وا پره دولا دولا ایگرنید. خیلی ز جوراوا خوم هم دیدم که غیوسون زیده بید. وبه همسایه هاهم سفارش کرده بید که جوراوا وجاکتاکهنه سونه پرت نکنن وبه دام بدن. موشهر بیدوم چند ماهی کارایکردوم . یه روز که سی دیدنی دا وبووم به روستاهه قلعه زراس رهده بیدوم تیم به یه قالی شش متری پر نشق ونگار ایوست.خیلی اربتوم وابید گدوم دایه توکه وضع مالیت خونبید که کلاف بخری ایهمه کلافنه ز کویه اوردی وقالی بفتی؟. خندید وگد آدوم هرکاری که ایخو بکنه ارمنه سنگ هم بوهه تره کارسه جفت وجور کنه موهیچ کلافی نخریدوم یو ز جنس هموجوراوا وجاکتایی بیدن که تو جستسون ایگشتی ونیدسون ومو ورتنگنیدومسون ودولاسون کردوم وگرنیدومسون واسون قالی بفتوم . حالا ایی قالینه هم ایدوم به کروم که زس استفاده کنه. گدوم دایه بنازوم به رهروشت کاریت وفرگ مالیت بنازوم به رنج ومرارت وصور وحوصله ات بهت افتخار ایکنوم که زجنس کهنه ها تازه هانه آفریدی. یوهم یکی دیه ز ابتکاراهه بیامرزی دام بید که چی دایل دیر بختیاری زهیچ زنده اینه آفریدنه.

چی کهن دایل جورکش روزگار وصویر پیایل زحمتکش بختیاری سرفراز وسردیار وبختیار بوهین.

    جلال اسفندیاری غریبوند: 13/8/96  

بافتنیهاهه بختیاری(برنامه همدلی صدای خوزستان)

 

  به نوم هوکه رهروشت ورهزهشت سازنده اینه سی آدومی آفرید

                               بافتنیاهه بختیاری

ایل بختیاریها سالها سال زنده ایه روستانشینی وعشایری داشته وکارسون گله داری وکشاورزی بید . مردمی دلیر وشجاع واهمه فاصله ز شهراهه گفتر ودیر ز پیشرفت وتکنولوژی تازه مین دل کها وصحراها زنده ای ایکردن اما واهمه کمی کرسیایی که داشتن و هر وسیله ای که نداشتن به هر چی که دسترسی نداشتن تا بدستسون ایرسید بخاطر ذوق ووهوشی که داشتن تندی فندسه یاد ایگرهدن وزریس راست ایکردن ملث راست کردن تفنگ برنو که او دورون تنها وسیله جنگی چریکاهه دنیا بید. و گدشتن ز سالها تنگ و دورون جنگ وآشفته ای ورنج ومرارت و گدشتن ز دورون جور وستم وقحط وگرفتکاری ، تینا حال وهواییکه ایی مردمونه سرپا نیه ایداشت ، مهر ومحبت بید وهیاری وهمدلی بید وکار وزحمت عشق به همدیه وزنده ای بید. زکمترین چیایی که رهوردارسون بید وترستن بس دسترسی داشته بوهن بهره ایگرهدن وروزگار سخت وسیاه و بی پناهینه بدیندا ایوندن. وا همه ایی نداریها وسختیها ورنج وجورا ، هی سرافراز وسردیار بیدن ودلیر وبیباک وزیرک ودوناد . مهمترین چیایی که بسون دسترسی داشتن وزس بهره ایبردن ریشه مین گله هایی داشتن که پیایل ایل هر چند ماهی یه دفعه پشما ومیاسونه چهره ایکردن .(چهره یه نوع قیچی بلندیه که مخصوص قیچی کردن پشم ومی گوسفند وبزه وبریدن پشم مینه واایی وسیله واگدنیاهه بختیاری چهره کردن ایگون) . بعد ز چهره کردن پشم ومی گله مابقی کارا بدست زینگل بیدن. یعنی ششتن پشم ومی وکشکنیدن واهمو شونه کارونی که بدست پیایل حونه راست اویده. وبا پره ودیباده یا ماسوره ایگرنیدن اول به شلک یه دسته یا یه تال وبعدس دو تال یا دوسر ودسته بندی وبعدس رنگ کردن وبستن به تمدار وبافت بعد بافتنی بافته وابیده ومابقی کارونیایی که ز بافتنی داشتن بکار ایبردن. ملث راست کردن سرپناه الصی عشایری یا بهون. گدیم که ایر چه ز چیاهه شهری و چندونی ز تمدن شهری بهره نیبردن ولی زهمو چیایی که رهورداسون بید وداشتن بهره ایبردن. زبهون سرپناه  الصی عشایر بختیاری گدیم که زجنس میه بز تالس راست ایبید ووا دوتا چو وافاصله هاهه دلخواه ودیر وسیله های ملث چوملار وسوک وکلکیک ووسیله ها ساده ای که رهوردارسون بید تمدار ایبستن و لت ایبفتن و ز وایک دهدن چندتا لت ویا روشت وکارونی خاصی وجاگوشه هایی وبند گوشه ها بهون راست ایبید. وچند چو زمینی وهوایی یا افقی وعمودی زیرس ایزیدن بندا گوشه هانه به مه یا بر ایبستن ومینس زنده ای ایکردن. گدیم که زینگل وپیایل بختیاری همه چیاهه ضروری الصی مین حونه ای وکارونیسونه خوسون بدست خوسون جور ایکردن. یکی ز ایی کاراهه الصی وضروری مین حونه ای بافتنیهاهه جوراجوره . بیشتر ایی بافتنیاهه جوراجور والصی زنده ای بدست زینگل بافته ایبیدن . بافتنیاهه پیایل ایر چه به اندازه زینگل نبید ولی سختیاهه خوسه هم داشت. زبافتنیاهه زینگل یاد ایکنیم. یکیسونه بهونه که پیش زیو گدیم سرپناهه الصی مردم عشایر بختیاریه. وحورجین که به شلک دوتی یا دوطرف هد که سی نیه داری چیاهه خردنی ودیر ورداشتنیا هد. وحور که بازهم دوطی بلندتر زحورجینه که سی آورد وبر بار گندم وجو وآرد وچیایی ملث اینو زجایی به جادیریه. شله که باز دوتی هد وسی بار کردن برد وگل ومشک او وبشکه وبردن زجایی به جادیریه. ایی بافتنیا بخاطر یو دوتی بافته ایبیدن که مود نهادنسون به کول حیوون به دوطرف حیوون براور وچسبون جابگرن. بهونن هم مود جمع کردن به شلک دوتی جمع ایکنن تا سی بار کردن راحتتر بوهه.لین که سی پوشوندن رختخو وحور وحورجین که ری تلواره جاسون ایدادن.موج سی ری ونی ، گلیم وخرسک وجاجیم وقالی سی پهن کردن زیرپا ومین حونه، سرفه آردی که ریس طوسی وآرد ومچه اینن وسی نون پزی بهره ایبرن . توربه که امروزه کوله پشتی جاسه گرهده. تیر که سی نیه داری نمک زس بهره ایبرن. جل که به کول حیوونا ایبندن تا مودسرما سردسون نبوهه یا ری چارپا ایونن سی بار بستن به کول حیوون تا مود بارکشی گردسون زحم نبوهه . چوقا که تن پوش الصی پیایل بختیاریه. لچک زینت داده به منجق والماسنما سی سر زینگل ووریست سی تنگ زیدن بار حیوونا یا او وهیمه به کول بستن وبه حونه اوردن . اوار که بندی به شلک بافتنیه وسی باربندی وبستن سروگردن حیوون به میخه. وشیر دنگ گل ومنگول کرده سی قشنگی مین حونه وخیلی چیادیری ملث اینو. البته کار بفتنی پیایل بختیاری ایرچه خیلی سختتر ززینگل بید ولی خیلی کمتر استفاده ایبید. ملث نمد مالی که نمد راست ایکردن زپشم ومی وزنمد هم لواسی به نوم کردین راست ایکردن که سی او وهواهه سرد گرم بید ، اومینس نفوذ نیکرد وبیشتر چوپونا ایپوشیدن.زهمی نمد کله نمدی راست ایکردن وگیوه کشی یا گیوه بافی وکیوون بافی که فارسی بس فلاخن ایگون سی رمنیدن حیوون وحشی و دزد وکارایی ملث اینو.مردم بختیاری زساده ترین چیایی که رهورداسون بید نهایت بهره نه ایبردن . چیا ضروری راست ایکردن. یادس بخیر دابیامرزیمه ایگوم . بیامرزی دام پشم ومی که گیرس نیوید ، نترست بیکار بنشینه بفرگ چاره ای ایوست ویه کار تازه ای بنظرس ایرسید. یادس اوید که کهنه لواساهه زیادی داره. قیچینه ورداشت ودست بکار بریدن لواسا وابید . لواسانه باریک باریک پلیش پلیش ایکرد. آخر سر واپره همی پلیشانه ایگرنید وچندین سر پلیش ایگرنید وپر گونی ایکرد. هرچند که مو خیلی کوچیر بیدوم ولی خو یادمه بیشتر ز پنجاه سال پیشنه ایگوم. یه روز دیدوم تمداری به دار ایکرد ورشتنانه به تمدار ایبست ودست بکار بفتن وابیدهمو پلیشانه که واپره گرنید درآورد وبه دار ایبفت بعد زچند روز یه گلیم شش مترینه دام وا نشق ونگاراهه قشنگی ایبفت.باور نیکردوم که ز ایی کهنه پروا یه همچی گلیمی قشنگ ونشقدار بافته بوهه. نوم ایی گلیمنه گلیم کهنه ایی اینهاد. یعنی زجنس کهنه وپرو بافته وابید. همسایه هاهه عشایر که تیس به گلیم کهنه ای دام ایوست ، زدام خواستن که ملث همو گلیم بفته س گلیمی سیسون بوافن. باور نیکنین هیچ همسایه عشایری نبید که دام سیسون گلیم کهنه ای نبفته بوهه.  دام واایی کارایی که سی همسایه ها ایکرد، خیلی خوشحال وسرفراز ایبید. روزگاری که مردم به هم عشق وامید داشتن وحونه یکی بیدن یاد او روزا هه مهر وهیاری وهمدلی بخیر. سالاهه بعد بید که بعضی زینگل زکارادام الهام ایگرهدن ولواسا کهننه پرت نیدادن وزسون گلیم ایبافتن ابتکاری که ز بیامرزی دام به یاد مند. دورونی هم که جوون بیدوم، یعنی دیپلوم گرهده بیدوم. مو عادت داشتم جاکت رنگی بپوشوم. چندتا ز جاکتا رنگیمه ورداشته بیدوم که سی تنگ تفاق زسون استفاده کنوم. دام دید که ایروزا آخر جاکت کم ایپوشیدوم ولی یه روز هوس پوشیدن جاکتی کردوم گشتوم ودیدوم خوری ز جاکتا رنگی نید ولی دیدوم که دام هرروز جوراوی جاکت کهنه زاین واون ایگرهد ایورتکنید وا پره دولا دولا ایگرنید. خیلی ز جوراوا خوم هم دیدم که غیوسون زیده بید. وبه همسایه هاهم سفارش کرده بید که جوراوا وجاکتاکهنه سونه پرت نکنن وبه دام بدن. موشهر بیدوم چند ماهی کارایکردوم . یه روز که سی دیدنی دا وبووم به روستاهه قلعه زراس رهده بیدوم تیم به یه قالی شش متری پر نشق ونگار ایوست.خیلی اربتوم وابید گدوم دایه توکه وضع مالیت خونبید که کلاف بخری ایهمه کلافنه ز کویه اوردی وقالی بفتی؟. خندید وگد آدوم هرکاری که ایخو بکنه ارمنه سنگ هم بوهه تره کارسه جفت وجور کنه موهیچ کلافی نخریدوم یو ز جنس هموجوراوا وجاکتایی بیدن که تو جستسون ایگشتی ونیدسون ومو ورتنگنیدومسون ودولاسون کردوم وگرنیدومسون واسون قالی بفتوم . حالا ایی قالینه هم ایدوم به کروم که زس استفاده کنه. گدوم دایه بنازوم به رهروشت کاریت وفرگ مالیت بنازوم به رنج ومرارت وصور وحوصله ات بهت افتخار ایکنوم که زجنس کهنه ها تازه هانه آفریدی. یوهم یکی دیه ز ابتکاراهه بیامرزی دام بید که چی دایل دیر بختیاری زهیچ زنده اینه آفریدنه.

چی کهن دایل جورکش روزگار وصویر پیایل زحمتکش بختیاری سرفراز وسردیار وبختیار بوهین.

    جلال اسفندیاری غریبوند: 13/8/96