به یاد زنده یاد لطفعلی اسفندیاری غریبوند پسر دایی مهربانی که پس از چهلمین روز مرگ فرزند ناکامش رضا 32سال خودنیز جان به جان آفرین بخشید یادش گرامی باد.                         

 بیوگرافی مرگ                                                                                                               دل دادوم به دلدار زنده ای نهادوم                                                                               

درد و غم کشیدوم ایبردوم  زیادوم                                                                    

تاروزی  که دیدوم داغی زبراروم                                                                 

ایگوی درد وماتم وربستن به باروم                                                                   

وا مرگ براروم دردوم بیشتر آبــــید                                                                       

غم وسته به جونم روزوم لیشترآبـــید                                                             

وامرگ براروم داغی زی به جونم                                                               

غم وسته به لاشوم کهده استخونوم                                                             

بووم ره زدنیادام هم پی سرس رهد                                                               

ایگوی مال دنیا زدور و ورس رهـد                                                             

دلوم بید غمگین غمم بید سنگین                                                                     

دلوم پرزخین بید تیام سهر ورنگین                                                                   

داغ گو شهیدوم نرهده زویروم                                                                   

داغ رودوم ای وای زیتر کرده پیروم                                                            

چندی غم کشیدوم به سینه سپردوم                                                             

سرم هی بلند بی به ری خوم نوردوم                                                               

چونو غم بسهدوم ایگوی تش گرهدوم                                                                

کاشکی ملث مردم خین وقرص برهدوم                                                             

زیدوم بدلوم شحم تحم غم بکشتم                                                              

طیف  غم وروهس سهدوم وبرشتوم                                                           

طیف سوز ماتم سهدوم وبرشتوم                                                                  

چی اوربهارون قرص به تی نهشتوم                                                             

دلوم نیگره جا سی کوگم اوی تنگ                                                               

ورداروم غمامه بسپاروم به کهرنگ                                                            

کهرنگ ای کهن یار ایل وتواروم                                                                   

ویدوم به پناهت خیلی گله داروم                                                                    

کهرنگ کفن پوش پیر خسته پیکر                                                                   

نه بینی واشنی میر کوری یا کر                                                                     

کهرنگ کفن پوش موهم گله مندوم                                                                   

کوگم ره زدستوم مودی سیچه مندوم                                                              

کهرنگ کفن پوش نگوی که غریووم                                                              

سی ایل ایخوروم غم سی یار ایگریووم         

بیدوم شیر یاغی نوستوم زپا خوم

ملث زرده بیدوم جهمستوم ز جا خوم

بیدوم شیر یاغی نوستوم ززونی                                                                                    

داغ نازنینوم وندوم به جوونی                                                                

روزگار نامرد  نزن تش به ریشم                                                                 

رخصتوم  ندادی گویل یان به پیشم                                                        

کهرنگ کد اسبید پیشت ایکنوم غش                                            

دلوم انجنیده تیام ایزنن تش        

کهرنگ صیادون کهرنگ دلیرون                                                              

بیشه ای نمنده ملث مو ز شیرون

* زبان حال همسرزنده یاد لطفی*

رهدی غم کنی در برشتوم وسهدوم                                                                        

مین دیگ دورون غم گرهده پهدوم                                                                        

رهدی غم کنی در بی تو غم گرهدوم                                                                      

مندیرت نشستوم حرص وخین ارهدوم                                                                     

رهدی دیر اویدی زمو بدچه دیدی                                                                   

گدی سیت ایسوزوم داغ بچه دیدی                                                                       

رهدی غم کنی در سیچه دیر اویدی                                                                    

گشتی دور کهرنگ ویارینه نیدی                                                                       

وادرد زمونه چندی غم کشیدی                                                                         

تی خوت ایگدی غم بدل کم کشیدی                                                                                    

بیدی ملث زرده ملث کوگ مستی                                                                      

داغی ز جوونون رمنیدت ووستی                                                            

روزگار غمساز زمون بد چه دیدی                                                                      

ورکشیدی گازی دندونی کشیدی

دندونی کشیدی نزیدی زمندی                                                                           

ورداشتی کلندی زیدی ریشه کندی                                                                    

روزگار بیرحم بیوفا چه کردی                                                                       

تش وندی به حونه بهونانه دردی                                                                     

نشتی تا که کوگوم بالی بوراره                                                                      

کشه پر به که غم زکولس دراره                                                                      

نشتی تاانیسم  چی بازی کشه پر                                                                      

به کهرنگ وزرده غماسه کنه در                                                                        

پرس کنین ز یارون آلطفینه نیدین                                                                    

رهدین وارفیقتون بی رفیق اویدین                                                                  

پرس کنین زیارون مر لطفی چه وابید                                                                 

ایگون نید وابامون ز ایما جدا بید                                                                   

مرلطفی چه وابید پرس کنین زیارون                                                                

ایگون غم گرهدس زیر برف وبارون                                                                   

دریغا زدورون ای وای ززمونه                                                                         

لطفی شو گرهدس نویده به حونه                                                                          

دریغا زدورون وایی روز وحالوم                                                                        

لطفی شو گرهدس نویده به مالوم                                                                             

خدایا به مو صور وطاقت عطاکن                                                                              

غم نازنینون زفرگم جدا کن                                                                           

جلال اسفندیاری غریبوند 5/12/95